Овој проект е дизајниран да го поттикне процесот на градење посилно граѓанско општество за подобра заштита на правата на децата, особено правото на децата Роми на еднаков пристап до квалитетно образование преку системот на формално образование. Проектните активности се фокусирани во вкупно 9 општини во Република Македонија (Шуто Оризари, Чаир, Топаана, Битола, Прилеп, Куманово, Штип, Кочани, Тетово и Виница) каде што има поголем број ромско население.
Во насока на остварување на наведеното се поставени пет специфични цели:
-
Јакнење на дијалогот и соработката меѓу власта и локалните организации во полето на инклузија на децата Роми во редовното образование;
-
Зголемување на постоечка база на знаење за прашања кои се однесуваат на вклучување на Ромите во образованието и во општеството и предлагање напредна политичка рамка со која се олеснуваат идните патишта на ромските деца кон пазарот на трудот преку зголемено учество во редовното образование;
-
Поттик на имплементацијата на постоечката регулатива за инклузија на Ромите преку градење организациски и човечки капацитети на невладините организации, кои работат со ромското население во 9 општини;
-
Подобрување на капацитетите на локалните власти за остварување на програми и мерки за инклузија на Ромите;
-
Зголемување на свеста за улогата на невладините организации во промоција на еднаквиот пристап до образование на Ромите.
Од практичен аспект, проектот ќе ги поддржи граѓанските организации, како и локалните власти во дизајнирање, имплементација и координација на едукативни инклузивни иницијативи за децата Роми и нивните семејства на локално ниво, врз основа на механизми за соработка. Од социјален аспект, широкиот опфат на кампањата за подигување на јавната свест ќе помогне во менувањето на перцепциите на јавноста во насока на препознавање на потребата од недискриминаторски и еднаков пристап на децата Роми до квалитетно образование.
Досега, спроведено е истражување на постојните состојби, а резултатите од истото се сумирани во рамките на сеопфатен извештај во кој е извршено идентификување на статутсот на ромската заедница во Македонија, особено на децата Роми и нивните семејства, како и предизвиците со кои тие се соочуваат при инклузијата во образованието, постојното законодавство и политиките во оваа област, како и граѓанските организации кои обезбедуваат услуги за поддршка на Роми и/или деца.
Понатаму, беше направено сеопфатно мапирање на граѓанските организации кои работат во оваа област, со фокус на проценката на нивните оперативни, технички капацитети и човечките ресурси со кои тие располагаат.
Во истовреме, беше направена квалитативна анализа на законската рамка и политиките, со што беа утврдени постоечките проблеми/недостатоци, како и беа идентификувани одржливи начини за промовирање на соодветна законодавна рамка и политики за нивно соодветно адресирање.
Овие аутпути беа презентирани на тркалезната маса која се одржа на 12 јули 2017. Учесниците беа од различни институции, вклучително и претставници од локалните самоуправи и граѓански организации кои ги споделија своите мислења во врска со темата и спроведените истражувања.
Наредниот чекор од проектот влучува дизајнирање и имплементација на шемата за под-грантови за локални граѓански организации, проследено со програма за градење капацитети на организациите кои ќе ги добијат грантовите, како и следење на имлементацијата на проектите.
